Færslur: 2012 September

25.09.2012 21:43

Helgiganga á Gufuskálum og messa í Ingjaldshólskirkju með keltneskum brag

Sunnudaginn 30. sept. verður efnt til helgigöngu með keltnesku ívafi sem lýkur með messu í Ingjaldshólskirkju. Lagt verður af stað frá Ingjaldshólskirkju kl. 12 á hádegi og ekið í rútu að ,,fiskbyrgjum" við Gufuskála. Þaðan verður gengið með keltneskan sólkross að einu byrgjanna og þar haldin stutt helgistund. Ýmsir telja, að þessi byrgi séu eldri en talið hefur verið og geti verið leifar af íverustöðum keltneskra einsetumanna. Þeir dvöldust í slíkum býkúpulaga steinbyrgjum á afskekktum stöðum á Írlandi og Skotlandi og höfðu samfélag sín á milli.

Frá byrgjunum verður ekið að Írskrabrunni,  gengið að brunninum með krossinn og haldin helgistund. Þaðan verður gengið að steinhleðslu niður við flæðarmál.  Lögun hleðslunnar gæti bent til fornrar kirkju. Þar fer einnig fram stutt helgistund. Síðan verður ekið aftur að Ingjaldshólskirkju, þar sem messa hefst kl. 14.

Leiðsögu- og sagnamenn í göngunni verða þeir Skúli Alexandersson og Sæmundur Kristjánsson. Sr. Óskar Ingi Ingason, sóknarprestur, og sr. Gunnþór Þ. Ingason, prestur á Biskupsstofu á sviði helgihalds og þjóðmenningar, leiða helgistundir göngunnar og messuna í kirkjunni. Göngufólk og heimamenn lesa ritningarorð og fornsögutexta. Kay Wiggs leikur á orgel og stjórnar kór Ingjaldshólskirkju.

Eftir messu verður boðið upp á kaffi og djús í safnaðarheimiliu.

Sóknarnefnd Ingjaldshólskirkju, Átthagastofa Snæfellsbæjar, Þjóðgarðurinn Snæfellsjökull, lista og menningarnefnd Snæfellsbæjar og Starfshópur þjóðkirkjunnar um helgistaði á föruleiðum, standa að þessu sérstæða helgihaldi. En það tengir saman þjóðmenningu, trú og land, sögu og samtíð. Dagskráin er fjölskylduvæn og allir hjartanlega velkomnir.

24.09.2012 13:57

Ben Stiller

Fallegt veður á Snæfellsnesi og Ben Stiller búin að koma í heimsókn. Snæfellsnesið er að verða heitur staður fyrir stórstjörnur og náttúruunnendur enda óvíða jafn fjölbreytt landslag.
Keflavík við Hellissand
  • 1

Mávur l Kt.: 680509-0850 l Bnr: 0111-26-10080 l VSK 104164 l Sími: 845 1780 l Netfang: mavur@mavur.is